Weekend

Hey guys,
Es esch weder einisch a dr Zyt vo öisem Läbe in „Down Under“ z‘brechte.
Am Fritigmorge hei mer met öisere Klass e Bootstripp id „inlets“ gmacht. Dr Rouf het de Kahn secher usem Hafe gschtüüret ond de het au s‘Denise s’Stüür id Hand gno ond het gar ned emou so e schlächti Faue aus Kapitän gmacht…Der chöit öich säuber drvo öberzüge, es het nöii Föteli!
Am Samschtig hei mer met emne andere Päärli es Auto gmietet ond si es betz id Höchi (Tabellands) gfahre. Mer hei verschedeni Sehenswördigkeite agluegt (e Nationalpark, dr Wasserfau Davis Creek, bsonders auti Böim „Fig-Trees“,…) Mer hei super Wätter gha ond e wäuz schöne Tag metenand verbrocht. Wöu das andere Päärli vo dr Tschechei chonnt, hei mer de au dr ganzi Tag nome Englisch gredt metenand. Am Samschtig esch es de ändlech sowit gse: mer hei öisi erschte Känguruh in freier Wöudbahn gseh. Es esch eifach onglaublech ufregend, was mer do aues erläbe…
Am Sonntig esch de för einisch nüüt gse met lang schlofe. Mer hei met eme Schwoger vo öisem Homestay-Father, em Jean-Claude, metchönne go fische. Am 6-si am Morge esch är öis cho abhole ond de simer as Meer gfahre ond hei sis chline Fischerboot igwasseret. Es esch uuuu chaut gse aber mer heis totau gnosse ufem Wasser dr Sonneufgang z’beobachte. Nach längerem Warte esch de s’Onglaubleche wohr worde. S’Denise het e riese Fisch gfange ond ne säuber zum Boot zoge, natürlech met fachmännerischer Höuf vom Jean-Claude. Se het drbi no Glöck gha, dass se dr Fesch ned is Wasser zoge het! Mer hei de dä Fesch met hei gnoh ond dr Yves het ne de zum z’Nacht kochet. Hmmm esch auso e wäuz feine Fang gse…
Geschter hei mer öis nach däm „aschträngende“ Weekend e chli müesse erhole. Mer si met em Bus a Palm Cove-Strand gfahre ond hei e suuper schöne Nomitag am Strand verbrocht. S’Meer do esch sogar im Winter agnähm warm zum go bade. Es esch e herrlech schöne Sandstrand dört ond es het ganz vöu schöni Palme. Dor d’Woche esch dä Strand au gar ned öberlofe. Du chasch dis Tüechli usbreite wo du wotsch ond eifach i Sand leggä. Es get do keni Privat- oder Hotelstränd. Es esch eifach aues öffentlech, sehr gepflegt ond suuber. Grad e chli wie im Paradis!
So e glaube das esch weder mou gnue för höt. Ganz liebi Grüessli Rouf ond Denise

Allerlei

Hallihallo,
Jetz hei mer grad weder noeii Foeteli uf oeise Blogg glade. So choeit der au einisch gseh, wo mer schoens wohne ond met waem as mer am letschte Sonntig es BBQ gha hei.
Dae BBQ-Event esch waeuz wetzig gse. Mer hei nis am 5-fi z`Obe bi dr Lagune am Strand met de andere vo dr Klass troffe ond hei nis de uf d`Suechi nachem e freie Grillplatz gmacht, waehrend die andere foer die ganzi Sipschaft dr Ichauf gmacht hei. Foer e Grillplatz muess me do ned emou oebis zahle. Do chame eifach haene cho ond s`Fleisch obdue... Esch waeuz praktisch ond onkompliziert!!! Mer hei e suuper wetzige Obe met dr Klass verbrocht ond hei ne de nachhaer imene Pub gmuetlech ond floessig lo usklinge.
Am Maentig hei mer i dr Schueu e raecht e happige Test gha. Mer hei beidi gmeint, dass mer ned eso guet abgschnette hei. Om so groesser esch de d`Oeberraschig gse, wo mer erfahre hei, dass mer a ahand vo daem Testresultat choei i die noechscht hoecheri Stufe waechsle. Mou luege oeb mer no metmoege...
Morn am Morge goei mer met dr Schueu ufene Bootstrip. Dr Rouf werd dr Kapitaen vo eim vo beidne Schiff si ond s`Denise esch chorzerhand aus si Vize bestemmt worde. Mer muesse morn e haub Stond vor de andere am Hafe si zum chli uebe. Das werd secher loschtig, wenn s`Denise das Boot duet schtuere...
Faus mer secher zrogg choeme ond vo keine Krokodil gfraesse waerde (do hets woerkli soettigi Vicher) loei mer gli weder oebis vo oeis lo ghoere.
sonnigi Gruessli us Australie Rolf ond Denise

langes Weekend

Hallo zaeme
am fritig hei mer do public holiday gha, drom hei mer ned ed schuel ,,muesse".
mer hei lang pfuuset spot z morge gno u si de gaege obe a d cairns-show. das esch oeppe wie d BEA oder d MUBA. S esch raecht loschtig u gwoessi sache si sehr speziell gseh...
Zom bispoeu doei die do aues praemiere, sogar s gmuess (siehe Fotos...)
Ou hei mer no es paar fotine usem rieserad gmacht, wie meh gseht darf me d schiischue ned id doere ha :-), tja d gondeli si haut us der schwiiz...

geschter hei mer lang pfuuset... naecher si mer zor lagoone, das esch so ne art gratis badi direkt am meer ah, rechtig cool. (me cha do ned direkt is meer, drom hei die das eso gloest...)
mer hei lang gsoennelt u ned emou e ha me verbroennt! am obe hei mer de onbedengt wele ,,dehei" si, schliesslech hed dr yves, uese homestay-father weder oepiss zom dinner zauberet, mmhhhh...
es esch no der homestay-mother eri schwoeschter med der familie cho, die si ou so rechtig nett u loschtig. velech chei mer noechscht sonntig med ehne uf ne bootstrip go krokdil luege u go angle, mer hoffe das klappet...

u hoet esch scho weder sonntig u mer hei lang pfuuset... ;-)
mer si med em yves uf em markt gseh u si etz nochli er city. am 5i hei mer med de schuelkollege zom BBQ abgmacht...
do chasch direkt ar lagune e grill miete, das werd secher loschtig.

mer woensche euch e schoeni zit

liebi gruess
denise ond rolf

at school

Hallihallo
Jetz droecke mer scho dr zwoeiti Dag d`Schueubank on es esch very funny. Mer si met ca. 10 Koreaner/Japaner, eim Tschech, zwoeine Spanier ond eire Schwizerin i dr Klass. Es esch waeuz spanned wenn me sech met dene verschedene Luet duet onterhaute. Es esch aber au e grossi Useforderig die Asiate z`verschtoh... Damet mer am Morge i dr Schueu au fit ond monter si, radle mer jede Dag 20 min met oeisne bikes zur Schueu. Au das esch ned emmer ganz eifach. Do herrscht Linksverchehr ond das esch foer oeis no noeiland!!!

Momentan raegnets grad bi oeis, aber es esch do trotzdaem gnue warm zom i de Flippflopps ond de chorze Hose omezlaufe. Am Donnschtig sett de s`Waetter weder besser si. De het Cairns oebrigens es grosses Fescht. Ond foer aui esch public holiday, das heisst no school on Friday!!!

Greetings, rouf ond denise

Welcom to Cairns

Heyhey,
Jetz si mer scho sett drüü Dag in Australie ond mer hei öis scho wäuz guet igläbt. Mer si do in Cairns härzlech bi öisere homestay-family empfange worde. Dr Yves, öise homestay-father esch 64 johr aut, d’Marielle sini frau esch es Johr jönger. Mer wohne do imene praktisch igrechtete Zenmmer met Färnseh (natürlech nome met australische Sänder). Mer hei öises eigete Bad ond läbe im EG i öisem eigete Riich. D’Marielle ond dr Yves hei sooooooooo härzegi Grosschend, wo im Huus i ond us göi. Mer si no flissig dra die 12 nöie Näme z‘lehrä. Dr Yves bechocht öis jede obe met eme wäuz feine Menu, hmmm. Mer hoffe, dass öis nach däm Monet d’Hose no passe….
Obwou mer erscht set ere chorze Zyt in Down Under si, hei mer scho so einiges erläbt:
Am öisem erschte Obe het dr Yves öis vorem is Bett go vorgfüehrt, wie är die grosse Frösch i sim Garte los werd. Er schpöut e Art Golf met ehne…
A öisem zwöite Dag si mer met em Yves a Markt in Cairns. Onglaublech wie gross d’Uswahl a fröschem Gmües ond Fröcht do esch. Mer hei nome gschtuuned. Do wird sogar dr Rouf zum Frochtässer J! Denn si mer no chli am Hafe on dem Strand/ dr Lagune noche gloffe ond hei e XXL Glace gässe, öbwou do Winter esch. Dr Yves ond d’Marielle jommere öbe Mou öber die chaute Temperature. Emmerhin esch es nome öbe zwösche 25 ond 30 Grad warm. Die müesse do z’Obe Pullover ond langi Hose aleggä, damet si ned verfrüüre…
Höt si mer met öisne homestay-parents nach Kuranda gfahre. Dört hei mer dr Rägewaud ond e beidrockende Wasserfall (Barron Falls)gse. Im Momänt het de Wasserfau ned so vöu Wasser wöu do zur Zyt Trochezyt esch. I dr Rägezyt mues es es gwautigs Naturspektaku si.
So jetz müesse mer langsam ufhöre söscht get das no e Roman ond bi öis esch scho gli Zyt för s’Bett. Schliesslech hei mer morn Grosses vor, öise erschti Schueudag stoht ufem Programm!!!

Greetings vom Rouf ond Denise

In Singapur...

Gugus
Vor öppe anderhaub stond si mer secher in singapur glandet. mer hei e ruehige flog gha und so rechtig chöne schloffe. do esch es em momänt nach de achtne zobe u scho donku. aber dosse esch es emmer no dröckend heiss. klar müesst me ned use; aaaaaber: do osse heds e kaktus garte med ere bar. me esch emmer no uf em floghafe gländ, aber zmetz em grüene u cha öppis chüels drenke, mmmhhhh...

i zwe stond god üse vorläufig letscht flog rechtig cairns, u e öbbe 10 stond werde mer s erscht mou e fuess uf austrlische bode setze...
mer wönsche üch e schöni zit u bes zom nöchschte iitrag...
liebe gruess, denis u rolf