Great Ocean Road

Hallihallo zäme,

dr Rouf het sech jetz grad met em dräckige Gschirr vom z’Nachtässe zum Abwäsche dervo gmacht ond me gheisse, weder mou öbbis i öise Blogg z’schribe. Mer esch das natürli no so rächt. Schliesslech weiss e nie, wie lang dass e no so verwöhnt werde….- Nenei, är esch jo scho e Guete!!!
Am letschte Mettwoch hei mer Melbourne erreicht ond hei vo dört us öises Abentüür zum Uluru chönne buche. Jetz esch sowit aues fix. Am nöchschte Sonntig flüge mer vo Melbourne nach Alice Springs id Wüesti vo Australie. Vo dört us mache mer e drüü dägigi Tour dors „red centre“ (s’Härz vo Australie). Nachhär flüge mer de vo Alice Springs nach Perth i Weste, wo mer de scho öisi letschti Woche in Australie wärde verbringe…
Vo Melbourne hei mer söscht bis jetz noni so vöu gseh. Mer si fangs go shoppe ond dr Rouf esch go d’Hoor schnide. Nach zwöi Däg si mer nämlech scho weder ufbroche ond hei nis „d’Great Ocean Road“ zum Ziel gno. Das esch e länge Strosseabschnett, wo die meischti Zyt diräkt dr Köschte noche füehrt. So gseht me vom Auto us diräkt ufs offene Meer. Das esch wäuz idröcklech gse ond mer hei mänge Stopp zum gniesse ond fötele igleit. Am Ändi vo dr „Great Ocean Road“ si mer de z‘Warrnambool acho. Das esch es chlises härzigs Städli, wo mers guet no chli länger hätte chönne ushaute. Z’Obe si mer de fein go z’Nachtässe ond si e Wasser-Liecht–Show, wo vorosse statt gfonde het, go luege. I dere Vorfüehrig hei si d’Gschecht vomene Schiffsonglöck ar Köschte vo Südaustralie nochegschpöut. Das het sech wörkli glohnt!
Jetz si mer z’Ballarat ond hei för morn scho weder einiges vor. Mer wie i alti Dorfteil vo däm Städtli go, wo sech vor guet 150 Johr aues oms Goud sueche dräit het. Wenn mer Loscht hei chöi mer öis au dra versueche… Morn am Nomitag gohts de för öis weder rechtig Melbourne, wo mer de öisi letschte zwöi Nächt i öisem geliebte Camper wärde verbringe, schnüff… Am Fritig müesse mer dä nämlech scho z’Melbourne zrogg gäh. Damet mer de vom Fritig a ned uf dr Stross müesse läbe, hei mer scho es chlises Hüsli ufem Campingplatz gmietet. So wärde mer die letschte Nächt in Melbourne verbringe, bevor mer am Sonntig is Flogzüg nach Alice Springs stiige.

Liebi Grüessli vo de zwöi Goudgräber
Denise und Rolf

Wandervögu

Gugus

Sit höt hets es paar nöii Föteli vo dr Füehrig dors Opera House in Sydney i öisem Fotialbom. Das esch ächt es onvergässlechs Erläbnis gse. Es esch öberwäutigend, wenn me das riese Konschtwärk mou chli cha vo enne gse. Zom Abschloss vo öisem Sydney Ufenthaut si mer de no fein am Hafe go z’Nachtässe.
Geschter si mer id Huusbärge vo Sydney“i de Blue Mountains“ go e Usflog mache. Drbi hei mer öbis gmacht, wo mer no nie vorhär zäme gmacht hei….- mer si go WANDERE…!!!Mer dänke, dass öis das öisi Öutere gar ned rächt glaube, si mer zwöi doch set eh ond je zwöi Wander-Moffu. Aber dä Usflog geschter esch ächt suuuper gse. Z’erscht hei mer met ehre Gondelbahn e Schlocht öberquert, si nachhär 1000 Stägetrett zdorab gloffe ond hei de e wonderschöne Spaziergang dore Waud gmacht. Zrog ufe Gipfu si mer de met dr steilschte Standseilbahn vor Wäut chauffiert worde. Aues in Auem het das Ganze öbe drüü Stond duuret. Zrog ufem Gipfu si mer de no is Restaurant go ichere, wie sech das nach ere rechtige Wanderig au ghört…J
Höt hei mer öis zum Ziel gno, d’Hauptstadt vo Australie chli go azluege. Mer müesse aber wörkli säge, dass mer öis meh vo dereStadt erhofft hei. Öis hets ned wörkli guet gfaue ond so si mer nacheme chorze Abstächer bim Parlamentshuus weder i öise Camper gstege ond wiiter rechtig Melbourne greist. Drbi hei mer weder e onglublech vöusitigi landschaft durchquert ond schlossändlech es Bijou vomene Campingplatz gfonde. Zom Z’Nacht hei mer höt Pfäffersteak, Teigware ond Gmües kochet, hmmm esch wäutklass gse.

Heits no guet, liebi Grüess
Rolf ond Denise

Sydney

Heyhey,
onglaublech wie die Zyt vergoht. In Australie laufe glaub d’Uhre dopplet so schnäu wie ir Schwiiz…
Sett em letschte Reisebrecht vo öis, hei mer scho weder vöu erläbt. Nach Surfers Paradise si mer wiiter dr Oschtköschte entlang Rechtig Sydney greist. Mer hei mehreri Stops i chlinere Ortschafte wie Bayron Bay, Coffs Harbour, Forsters und Newcastle gmacht. In Bayron Bay hei mer no tiptpo schöns Wätter gha ond es esch no mou so rechtig warm gse. Nachhär hei mer de au mou chönne erläbe, was es heisst, wenns do mou so rechtig rägnet. (Coffs Harbour ond Forsters) Mer si froh gse, dass öises mobile Dehei däm velä Räge stand ghaute het. So hei mer de vöu Zyt met spelä (mer hei öis do es nöis Speli kouft), läse ond schlemmä verbrocht. Es esch öis auso öberhaupt ned längwiilig worde. Trotzdäm si mer de au froh gse, wo’s Wätter nach drüü Däg weder besserer worde esch. Sett am letschte Sonntig wohne mer do chli osserhaub vo Sydney ufem e schöne Campingplatz. So chöi mer jede Dag ohni Stress per Bus oder Fähri id City pändle. Sydney esch e suuuper schöni Stadt. Me cha do so vöu gseh ond mache, me weiss gar ned rächt wo me söu afoh. Nachdäm mer öis am Sonntignomitag met Infomaterial ideckt hei, si mer e erschte Blick ofs wäutbekannte Opera House ond die idröcklechi Harbour Bridge go wärfe. Am Mäntig hei mer de e 5-Tages Pass glöst, med däm chei mer i dere Zit aui Fährine ond Büs onbegränzt bruche. Das esch e tiptopi Sach, wöu so chöi mer wäuz flexibu si ond das mache, wo mer grad Loscht drzue hei. Sit am Mäntig hei mer scho so mängi Fahrt im Hafe vo Sydney gmacht, si ufene Ussichtsponkt vor Harbour Bridge gange, hei dr Huusstrand vo Sydney (dr Bondi Beach) bsuecht, hei verschedeni Stadtteile onsecher gmacht ond geschter z’Obe met Blick uf d’Harbour Bridge z’Nacht gässe. För die nöchschte zwöi Däg hei mer no folgendi Plän: e Füehrig im Opera House go metmache, dor verschedeni Märkt schlenderä, go shoppe i de riese Ichoufszenträ, s’Power House-Museum (ähndlech wies Verchehrshuus) go aluege,ond, ond ond. Wie der chöit gseh, werds eim do ned eso schnäu lanwilig…Öis gfauts do rechtig guet ond S’Wätter zeigt sech bis jetz au for beschte Siite. Obwou mer do jetz dütlech merke, dass es nöm e so warm esch wie em Norde.
Ganz liebi Grüessli vo de zwöi Grossstadt-Landeier