Absched vom Zigünerläbe

G`Day

Ond scho weder esch öber ei Woche verbi sed mer s letscht mou öppis do ine gschrebe hei. D Zyt louft ome no schnäuer omso nöcher as mer as heiflüge chöme, aber mer löi eus ned lo ablänke ond gniesse eusi Zyt do in volle Zög.
Letscht Woche hei mer euse gliebt Camper müesse omegäh. Nach 7 Woche treue, zuverlässige Dienschte, vele loschtige, erläbnisriche ond ome wenige rägnerische Stonde ond 6261 Kilometer entlang der Oschtköschte esch die idrocksriche ond spannendi Zyt am vorletschte Fritig vöu z schnäu verbie gseh. Mer hei es paar Stonde med potze verbrocht bevor mer euse Camper in Melbourne omägäh hei.
Mer hei zwe witeri Nächt in Melbourne verbocht ond am Samschtig hei mer der Rugby AFL Grand-Final medverfolgt. Die 100`000 Plätz em Stadion sie scho lang usverchouft gse ond so hei mer das Schpöu med vöune andere Lüt vor ere Grosslinwand medverfougt. So vöu wie mer medbecho hei esch es e spannendi Partie gse, vöu me hei mer vo de Regle aber ned medbecho…
Vor em Spöu hei sech Denise u eg je för ei Mannschaft entschede, as mer eus ou chli hei chöne medfiebere ond rivalisiere J. Leider hed em letschte Viertu dr Denise ehri Mannschaft agfange bschisse, der Schiri hed ne ghoufe, d`Sonne hed bländet ond der Wend hed gchutet ond bes am Schloss hed mini Mannschaft höchus verlore! D Auschtralier hei gmeint mini Mannschaft sig eifach nöm konzentriert gse, aber die chöme jo gar ned druus…
Am Sonntigmorge si mer i auer Hergottsfrüeh a Floghafe ond nach Alice Springs gfloge. Mer si scho gli em Hotel gse, hei aber no müesse warte bes mer am 2 ufs Zemmer hei chöne. So si mer chorzentschlosse i s Restaurant näb em Hotel zom serschte mou dr Dorscht lösche. Be gäge 40 Grad em Schatte es ou ned s letscht mou gseh…
Chum abghocket hei mer scho Bekanntschaft med typische Australier gmacht: höufsbereit ond emmer dorschtig. Mer hei zäme gspröchelt ond hei veli Tips öber ehri Heimatstadt Perth becho, leider hei mer se zwe Stond spöter nömm verstande…
Der Mändig hei mer am Pool verbocht, hei chli badet, gläse ond eus för eusi Tour gstärcht wo am Dsischtig gstartet esch. Mer si för drüü Däg id Wüeschti gfahre ond hei veli tolli Sache chöne go aluege. Mer hei a Canyon bewanderet, i total abglägni Gasthüser Wasser ond Bier gchouft ond wöudi Kamel gseh. Zobe hei mer onder freiem Hemmu chöne öbernachte ond der ongloublech Stärnehemmu beschtune bes eim d Ouge zugheit si…
Aber vorauem hei mer der Ayers Rock, oder Uluru wie d Uhriwohner säge, bsuecht ond dr Sonneondergang ond am nöchschte Dag der Sonneufgang a däm idröckleche Monolith chöne bestuhne. Das esch omwärfend gse!
Ond etz si mer in Perth a der Weschtköschte. Leider esch das ou scho öisi letschti Destination i däm ongloublech tolle Land. Nach ome eim Dag fühle mer eus do scho wie Deheim…
Am Fritig gohts weder a Floghafe ond mer verlöi Australie om en Singapur euse Urlaub lo usklenge. Ond scho gli lande mer weder ir Schwiiz, mer probiere e chli australischi Früehligssonne med heizbrenge as der ou nochli öppis derfo heid…

Liebi Grüess ond bes gli
Denise ond Rolf