Great Ocean Road

Hallihallo zäme,

dr Rouf het sech jetz grad met em dräckige Gschirr vom z’Nachtässe zum Abwäsche dervo gmacht ond me gheisse, weder mou öbbis i öise Blogg z’schribe. Mer esch das natürli no so rächt. Schliesslech weiss e nie, wie lang dass e no so verwöhnt werde….- Nenei, är esch jo scho e Guete!!!
Am letschte Mettwoch hei mer Melbourne erreicht ond hei vo dört us öises Abentüür zum Uluru chönne buche. Jetz esch sowit aues fix. Am nöchschte Sonntig flüge mer vo Melbourne nach Alice Springs id Wüesti vo Australie. Vo dört us mache mer e drüü dägigi Tour dors „red centre“ (s’Härz vo Australie). Nachhär flüge mer de vo Alice Springs nach Perth i Weste, wo mer de scho öisi letschti Woche in Australie wärde verbringe…
Vo Melbourne hei mer söscht bis jetz noni so vöu gseh. Mer si fangs go shoppe ond dr Rouf esch go d’Hoor schnide. Nach zwöi Däg si mer nämlech scho weder ufbroche ond hei nis „d’Great Ocean Road“ zum Ziel gno. Das esch e länge Strosseabschnett, wo die meischti Zyt diräkt dr Köschte noche füehrt. So gseht me vom Auto us diräkt ufs offene Meer. Das esch wäuz idröcklech gse ond mer hei mänge Stopp zum gniesse ond fötele igleit. Am Ändi vo dr „Great Ocean Road“ si mer de z‘Warrnambool acho. Das esch es chlises härzigs Städli, wo mers guet no chli länger hätte chönne ushaute. Z’Obe si mer de fein go z’Nachtässe ond si e Wasser-Liecht–Show, wo vorosse statt gfonde het, go luege. I dere Vorfüehrig hei si d’Gschecht vomene Schiffsonglöck ar Köschte vo Südaustralie nochegschpöut. Das het sech wörkli glohnt!
Jetz si mer z’Ballarat ond hei för morn scho weder einiges vor. Mer wie i alti Dorfteil vo däm Städtli go, wo sech vor guet 150 Johr aues oms Goud sueche dräit het. Wenn mer Loscht hei chöi mer öis au dra versueche… Morn am Nomitag gohts de för öis weder rechtig Melbourne, wo mer de öisi letschte zwöi Nächt i öisem geliebte Camper wärde verbringe, schnüff… Am Fritig müesse mer dä nämlech scho z’Melbourne zrogg gäh. Damet mer de vom Fritig a ned uf dr Stross müesse läbe, hei mer scho es chlises Hüsli ufem Campingplatz gmietet. So wärde mer die letschte Nächt in Melbourne verbringe, bevor mer am Sonntig is Flogzüg nach Alice Springs stiige.

Liebi Grüessli vo de zwöi Goudgräber
Denise und Rolf