abwaechsligsrichs Weekend

Heyhey
D`Zyt lauft ond lauft, esch onglaublech, dass mer jetz nome no 1 Woche in Cairns si. Oeis gfauts do waeuz guet, dass mer no lang do choennte bliibe. Es get sooooo voeu, wo me vo do us ir Omgaebig choennti mache. Aber leider laengt d1Zyt ned foer aues. Es get secher no so maengs schoens Plaetzli in Australie, wo uf oeis wartet...
Am letsche Samschtig si mer met em Scheff uf Fitzeroy Island gange. Das esch e chlini Insle i dr Noechi vo Cairns. Mer hei doert e Tour met em ne Glasbode-Scheff gmacht zom s`Koralle-Riff azluege ond hei Schnorchu-Usroeschtige gmietet. Es esch wie fascht emmer do schoens Waetter gse ond mer hei dr ganzi Tag met schnorchle ond soennele verbrocht. Mer si waeuz erschtuund gse, wie guet, dass me bim Schnorchle d`Koralle cha gse. Die Onterwasserwaut het oeis so beidrockt, dass mer oeis entschede hei, am noechschte Sonntig es Schnoppertauche am Great Barrier Reef z`mache.
Am Sonntig hei mer oeis de weder einisch met soennele ond bade i dr Lagune vergnuegt. Au das esch oeis no lang ned verleidet....
Am Maentig si mer de foer einisch ned id Schueu (yupiii), sondern hei met oeisere Homestay-Family e Usflog nach Cooktown gmacht. Dr Hewaeg si mer uf relativ guete Strosse gfahre ond si oebe nach 4 Stond Fahrt in Cooktown acho. Doert hei mer de am Hafe z`Mettag gaesse ond si nachhaer no is James Cook-Museum gange. (Esch emfau ned oeisi Idee gse...)
Ofem Heiwaeg hei mer oeise 4WD de woerkli brucht. Mer hei zwoesche dore ned gwoesst, oeb das woerkli no e Stross set si, wo mer druffe gfahre si. Mer si schlemmer aus oeber Stock ond Stei gfahre ond hei zwoesche dore au mou muesse e Bach dorquere. Es esch nis zwoeschedore chli vorcho wie innere Rally. Oeis hets nome einisch so rechtig doregschoettlet. Dr Yves het das Gfaehrt aber secher weder zrog nach Cairns gschtueret. Oeis esch zom erschte Mou so rechtig bewosst worde, wie gross as do d`Distanze si. I dr Schwiiz waere mer geschter locker is Tessin ond zrogg tuckeret...

Sonnigi Gruessli us Cairns
Rolf und Denise