Brisbane

Hey guys,
Jetz esch es scho weder es Wili här, sett mer öich s’letschte Mou ufem laufende ghaute hei. Mer hei die letschte vier Nächt ufeme Campingplatz ganz ir Stadtnöchi vo Brisbane verbrocht. Am Donnschtig si mer in Brisbane go shoppe wöu s’Wätter ned so guet gse esch. Am Friti hei mer e Sightseeing-Tour per Bus gmacht. Das esch no e gueti Sach gse. Mer hei för e ganze Dag es speziells Busticket glöst ond hei de a verschedene Statione chönne usstige ond Sache go aluege ond schpöter weder i Bus istige ond dört ane witterfahre, wo mer dr nöchschti Haut hei wöue mache. Am Samschtig hei si z’Brisbane s „river festival“ gfiret. Das söu do glichzitig au dr Alass si zom dr Winter z’verabschedä. Z’Obe hei mer es haubschtöndigs Füürwärch mets ir City chönne beschtuune. Mer hei per Zuefau e rechtig guete Platz ergatteret zom das Spektaku metzerläbe. In Brisbane esch das glaub wörkli e riese Sach. Do hets Lüüt gäh wo sett am Mettag met Campingschtüeu, Schlofsäck ond Chüeuboxene am Flussufer ghocket si, damet se sech e exklusive Platz hei chönne sechere. Es esch glaub ned nome ome guete Platz gange. So wies öis dönkt het, hei die Lüüt das gnosse, dr Dag so am Flussufer met picknicke ond plöiderle z’verbringe. Aus in Auem esch Brisbane e schöni, suberi Stadt met eme mega guet organisierte öffentleche Verchehrsnetz. Do hei sogar mer Schwiizeer nome gschtunedJ!!!
Höt am Morge si mer de nach eme feine z’Morge nach Surfers Paradise ufbroche. Wöus Wätter höt guet gse esch, si mer chli a Strand gläge ond hei d’Sonne so rechtig chönne gniesse. S’Denise het sogar e Schwomm im Meer gmacht während der Rouf i sim änglische Buech versonke esch…Sandigi Grüessli vo de beide Zigüner