Tierisches...

G’day
Em Momänt höckle mer grad vor eusem mobile Dehei ond gniesse d Obesonne. Mer hei do en Colundra e super Campingplatz gfonde; mer chei direkt vo eusem Laptop es Internet.
Vorgeschter am morge hei mer öppis wäuz imposants dörfe meterläbe:
Mer si am morge früeh ufgstande ond hei nis ohni zmorge uf e wäg a Hafe in Tin Can Bay gmacht. Das esch es chlises Näscht wo chum öppis los esch. Osser am morge früeh!
Vor öber 50 Johr hed dört e Fescher e Delphin schwär verletzt ond de med a Hafe gnoh zom ne gsond pfläge. Set denn chöme dört fasch au morge Delphine direkt as Ufer ond wärde dört gfueret. Mer hei das säuber dörfe mederläbe ond sogar ou e Fisch fuere. Eifach ongloublech was dass för tolli Tier si!
Das ganze wird vo freiwellige Häufer doregfüehrt ond esch wörkli super gmacht. Die passe uf as die Delphin ned zvöu Fesch öberchöme, so dass se säuber ouno müesse go Nahrig suechä. Ou hets gar ned eso vöu Lüt gha, das ganze esch nämlech meh e Gheimtipp! Mer heis ou ome gwösst wöu es australischs Päärli, wo mer uf eme Campingplatz atroffe hei, eus dä Tipp geh hed.
Geschter si mer de vo Noosa us is Underwater-World Aquarium gange. Dört hei mer wäuz vöu interessanti Meehresbewohner chönne beschtuune, wie onteranderem dr Nemo ond s’Dori. Am beschte het öis aber e 80m langs Onterwasser-Tunnel gfaue. Vo dört us hei mer sogar Haie chöne gseh, wo grad näbe oder öber öis dore gschwomme si.
Ond höt esch es grad tierisch wiitergange. Mer hei dr Australia Zoo i dr Nöchi vo Brisbane bsuecht. Dä Zoo esch wörkli super gmacht, die Tier hei riesig vöu Platz. Sogar em Rouf, wo schösch ned so e Zoo-Fan esch, hed das gfaue. Mer hei chöne Känguhrus ond Koalas strichle, Elefante fuärä ond e hufä anderi astralischi Tier chöne bestune.
Ond gli si mer de scho in Brisbane wo mer secher es paar Däg wärde verbrenge…
Mer wönesche euch e schöni Zit, liebi Grüess
Denise ond Rolf